എന്‍റെ സ്വന്തം കോളേജിന്..

ഞങ്ങളുടെ ലോകത്ത് വാക്കുകളുണ്ട്,
മൂര്‍ച്ചയില്ല..

വരികളുണ്ട്,
അര്‍ത്ഥമില്ല..

ആദര്‍ശങ്ങളുണ്ട്,
അടിയുറപ്പില്ല..

അഭിപ്രായങ്ങളുണ്ട്,
കൂട്ടായ്മയില്ല..

പ്രതികളുണ്ട്‌,
പ്രതികരണങ്ങളില്ല..

അറിവുണ്ട്,
വിവേകമില്ല..

സ്വപ്നങ്ങളുണ്ട്,
പകളുകളില്ല..

പ്രതീക്ഷകളുണ്ട്,
അതെ..ഇല്ലാതാകുന്നത് ഞങ്ങളാണ്,
ഞങ്ങള്‍ മാത്രം...

ജീവന്‍റെ ചെകുത്താന്‍ ...

ഉറുമ്പുകളുടെ ദൈവമാകണം
മധുരം കണ്ടുപിടിച്ചത്
തേനീച്ചകളുടെ ദൈവം തേനും
കുയിലിന്‍റെ ദൈവമാകും
പാട്ട് കണ്ടുപിടിച്ചത്
കോലിന്‍റെ ദൈവം താളവും.

അര്‍ത്ഥങ്ങളുടെ ദൈവം അക്ഷരങ്ങളും
ചിലങ്കയുടെ ദൈവം നൃത്തവും കണ്ടുപിടിച്ചു.

അങ്ങിനെയെങ്കില്‍ ജീവന്‍റെ ദൈവമാകും
സ്നേഹം കണ്ടുപിടിച്ചത്
അതുകൊണ്ടല്ലേ ജീവനുള്ളവയെല്ലാം സ്നേഹിക്കുനത്?
പക്ഷികള്‍ , മൃഗങ്ങള്‍ , മരങ്ങള്‍ ,
ചെടികള്‍ , പൂവുകള്‍ , നീ, ഞാന്‍ .....

എന്നിട്ടുമെന്തേ നിങ്ങള്‍ ഞങ്ങളെ ദ്രോഹിക്കുന്നു, അപമാനിക്കുന്നു?
അടക്കിവാഴുന്നു?
നിങ്ങളുടെ ദൈവമിത്ര ക്രൂരനാണോ?
അതോ നിങ്ങളുടെ 'തമ്പുരാന്‍ ' ജീവന്‍റെ ചെകുത്താനോ??